नगर कृषी उत्पन्न बाजार समितीचे माजी सभापती भानुदास कोतकर यांनी जिल्हा बँकेच्या संचालिका सुरेखा कोतकर यांना त्यांच्या वाढदिवसानिमित्त हेलिकॉप्टर भेट

पत्नीच्या वाढदिवसानिमित्त भानुदास कोतकर यांनी दिली हेलिकॉप्टरची भेट.. देवस्थानांवर पुष्पवृष्टी. अहिल्यानगर मधील केडगाव नगर कृषी उत्पन्न बाजार समितीचे माजी सभापती भानुदास कोतकर यांनी आपल्या पत्नी, जिल्हा बँकेच्या संचालिका सुरेखा कोतकर यांना त्यांच्या वाढदिवसानिमित्त हेलिकॉप्टर भेट म्हणून दिले. यामुळे कोतकर कुटुंबाच्या वाहन ताफ्यात हेलिकॉप्टरची भर पडली आहे.

हेलिकॉप्टरसाठी खास हेलिपॅड

आज केडगाव येथे या हेलिकॉप्टरसाठी खास हेलिपॅड तयार करण्यात आले होते. हेलिकॉप्टर केडगावात दाखल होताच कोतकर दाम्पत्याने त्याची विधिवत पूजा केली.

देवस्थानांवर पुष्पवृष्टी

पूजेनंतर या हेलिकॉप्टरने हवेत भरारी घेऊन केडगावच्या रेणुका माता मंदिर, शहराचे आराध्य दैवत श्री विशाल गणपती मंदिर व माळीवाड्यातील छत्रपती शिवाजी महाराज यांच्या अश्वारूढ पुतळ्यावर पुष्पवृष्टी करण्यात आली.

अनेक वर्षांचे स्वप्न पूर्ण

नगर, पुणे, मुंबई येथे हॉटेल व्यवसायात नावलौकिक असलेल्या कोतकर कुटुंबाचे स्वतःचे खासगी हेलिकॉप्टर खरेदी करण्याचे अनेक वर्षांचे स्वप्न होते. ते आज पूर्ण झाले, अशी भावना उद्योजक सचिन कोतकर यांनी व्यक्त केली. लवकरच खासगी हेलिकॉप्टर कंपनी स्थापन करून अलिशान हेलिपॅड उभारले जाणार आहे.

कोतकर कुटुंबाचा व्यवसाय

केडगावच्या कोतकर कुटुंबाने हॉटेल व्यवसायात मोठा नावलौकिक कमावला आहे. त्यांच्या ‘संदीप हॉटेल’ ब्रॅन्डला अनेक पुरस्कार मिळाले आहेत. भानुदास कोतकर यांचे तीनही पुत्र हॉटेल व्यवसाय सांभाळतात. नगरचे माजी महापौर संदीप कोतकर सध्या पुण्यातील हॉटेल व्यवसायात आघाडीवर आहेत.