अहिल्यानगरमध्ये फिल्मीस्टाईल दरोडा, प्रवासी बनून बसले 3 दरोडेखोर, चालकाला बाहेर फेकून Swift कार पळवली

अहिल्यानगरमधील खोसपुरी शिवारात 14 जूनच्या पहाटे उबर चालक विशाल कट्टीमनी यांच्यासोबत थरारक दरोड्याची घटना घडली. पुण्यातून शेवगावकडे तीन प्रवाशांना घेऊन जात असताना एका प्रवाशाने लघवीच्या बहाण्याने गाडी थांबवण्यास सांगितले.

गाडी पुन्हा सुरू होताच आरोपींनी चालकाच्या डोक्याला पिस्तूल लावून त्यांचे हात दोरीने बांधले आणि बेदम मारहाण केली. त्यानंतर जखमी चालकाला चालत्या गाडीतून खाली फेकण्यात आले.

आरोपींनी चालकाची सोन्याची अंगठी, रोख रक्कम आणि सुमारे 5.70 लाख रुपये किमतीची स्विफ्ट डिझायर कार लंपास करून पलायन केले. घटनेनंतर एमआयडीसी पोलीस ठाण्यात गुन्हा दाखल करण्यात आला असून आरोपींच्या शोधासाठी विशेष पथके रवाना करण्यात आली आहेत. या घटनेमुळे महामार्गावरील सुरक्षेचा प्रश्न पुन्हा ऐरणीवर आला आहे.