
अहिल्यानगरमधील केडगाव उपनगरात घरफोडीची खोटी तक्रार देणाऱ्या आदर्श ज्ञानदेव तनपुरे (वय २५) या फिर्यादीलाच कोतवाली पोलिसांनी अवघ्या चार तासांत अटक केली आहे.
१७ नोव्हेंबरच्या रात्री ते १८ नोव्हेंबरच्या सकाळच्या दरम्यान केडगावच्या मराठा नगर येथील तानाजी मालुसरे अपार्टमेंटमधील आपल्या फ्लॅटचे कुलूप तोडून अज्ञात चोरट्याने १ लाख २५ हजार रुपये रोख चोरून नेल्याची फिर्याद आदर्श तनपुरे याने कोतवाली पोलीस ठाण्यात दिली होती.
पोलीस निरीक्षक नितीन देशमुख यांच्या मार्गदर्शनाखाली सपोनि विशाल चिटणीस व गुन्हे शोध पथकाने सीसीटीव्ही, श्वान पथक व फॉरेन्सिकद्वारे तपास केला असता फिर्यादीच्या हालचाली संशयास्पद आढळल्या.
चौकशीत समोर आले की, आई दिवाळीनिमित्त माहेरी गेल्यावर आदर्शने घरातील ही रोकड आपल्या एचडीएफसी बँक खात्यात भरून ‘एक्सएम’ डीमॅट खात्याद्वारे ऑनलाईन फॉरेक्स ट्रेडिंगमध्ये गुंतवली होती.
ट्रेडिंगमध्ये पैसे गमावल्याने घरच्यांना न सांगता त्याने घरफोडीचा बनाव रचला होता. पोलिसांनी त्याचे बँक विवरण व मोबाईल जप्त करून त्याला अटक केली असून, न्यायालयाने त्याला २१ नोव्हेंबरपर्यंत पोलीस कोठडी सुनावली आहे.




