
केंद्रीय जलशक्ती मंत्रालयाच्या निर्देशानुसार आणि महाराष्ट्र शासनाच्या मृद व जलसंधारण विभागाकडून राबविण्यात येत असलेल्या ‘जलशक्ती अभियान – कॅच द रेन २०२६’ अंतर्गत अहिल्यानगर जिल्ह्यासाठी १ लाख ५८ हजार ६५६ कृत्रिम भूजल पुनर्भरण संरचना उभारण्याचे महत्त्वाकांक्षी उद्दिष्ट निश्चित करण्यात आले आहे.
उद्भवलेल्या ‘अल निनो’ परिणामामुळे निर्माण होणारी संभाव्य दुष्काळी परिस्थिती टाळण्यासाठी आणि पाणीटंचाईवर मात करण्यासाठी मे २०२७ पर्यंत संपूर्ण राज्यात ३४ लाख ८३ हजार ९४० संरचना उभारण्याचे काम युद्धपातळीवर हाती घेण्यात आले आहे. या मोहिमेची प्रभावी अंमलबजावणी करण्यासाठी जिल्हाधिकारी आणि महानगरपालिका आयुक्तांच्या नियंत्रणाखाली विविध शासकीय विभागांना स्वतंत्र उद्दिष्टे देण्यात आली आहेत.
यामध्ये भूजल सर्वेक्षण, ग्रामविकास, कृषी, वन, जलसंपदा आणि सार्वजनिक बांधकाम विभागाच्या माध्यमातून गाव तलाव पुनर्जीवन, सिमेंट नाला बंधारे, शेततळी आणि शाळा व सरकारी इमारतींवर ‘रूफ टॉप रेन वॉटर हार्वेस्टिंग’ व शोषखड्डे उभारून भूजल पातळी वाढवण्याचा मुख्य उद्देश आहे.




