अहिल्यानगरमधील सावेडी उपनगरातील श्रीरामचौक परिसरात १२ नोव्हेंबर रोजी भरदिवसा अज्ञात चोरट्यांनी बंद घरे फोडून लाखो रुपयांचा ऐवज चोरून नेला आहे.
राष्ट्रवादी काँग्रेसचे नगरसेवक बाळासाहेब पवार यांचे कुटुंबीय बहेगावी गेले असल्याने ते घरी एकटेच होते. दुपारी १२ च्या सुमारास पवार कामानिमित्त घराला कुलूप लावून बाहेर पडल्याची संधी साधत चोरट्यांनी त्यांच्या घराचे कुलूप तोडून कपाटातील चार ते पाच तोळे सोन्याचे दागिने आणि रोकड लंपास केली.
त्याचबरोबर त्यांच्या पाठीमागील बाजूस राहणारे अमोल सूर्यकांत झेंडे यांच्याही बंद घराचे कुलूप तोडून चोरट्यांनी तीन ते चार तोळे सोने आणि ५२ हजार रुपये रोख रक्कम चोरून नेली.
भरदुपारी झालेल्या या घरफोडीच्या घटनांमुळे परिसरात मोठी खळबळ उडाली आहे. घटनेची माहिती मिळताच तोफखाना पोलीस, स्थानिक गुन्हे शाखा, श्वान पथक आणि ठसे तज्ज्ञांनी घटनास्थळी धाव घेत पंचनामा केला. चोरी करतानाचा चोरटा सीसीटीव्ही कॅमेऱ्यात कैद झाला असून, त्या फुटेजच्या आधारे पोलीस अधिक तपास करत आहेत.
