रिलायन्स स्मार्ट बाजारच्या माजी कर्मचाऱ्यानेच फोडली कॅशरूम, 4.66 लाखांची रोकड लंपास….

अहिल्यानगर शहरातील सावेडी येथील रिलायन्स स्मार्ट बाजारच्या कॅशरूममधील तिजोरी फोडून ४ लाख ६६ हजार ३९० रुपयांची रोकड चोरणाऱ्या माजी कर्मचाऱ्यासह दोघांना स्थानिक गुन्हे शाखेने अवघ्या चार दिवसांत अटक केली आहे.

९ नोव्हेंबर रोजी चोरट्यांनी सर्व्हररूमच्या खिडकीचे गज कापून आणि काच फोडून ही चोरी केली होती, ज्याबाबत तोफखाना पोलीस ठाण्यात गुन्हा दाखल झाला होता. पोलीस अधीक्षक मुम्मका सुदर्शन यांच्या आदेशानुसार पोलीस निरीक्षक संतोष मुटकुळे यांच्या पथकाने तांत्रिक विश्लेषण व गोपनीय माहितीच्या आधारे विशाल अंशाबापू चेमटे (वय ३२, रा. बोल्हेगाव) आणि सुधीर दिनकर घोडके (वय ३९, रा. भिस्तबाग, सावेडी) यांना ताब्यात घेतले.

दोन वर्षांपूर्वी याच मॉलमध्ये काम करणाऱ्या विशालला जमा होणाऱ्या पैशांच्या ठिकाणाची इत्थंभूत माहिती असल्याने त्याने साथीदारासोबत क्विड कार व दुचाकीचा वापर करून हा चोरीचा कट रचला होता. पोलिसांनी त्यांच्याकडून ४ लाख ४४ हजार रुपये रोकड आणि दोन वाहने असा एकूण ८ लाख २४ हजार रुपयांचा मुद्देमाल जप्त केला आहे.