
अहिल्यानगर महापालिकेच्या स्थायी समितीच्या मंगळवारच्या सभेत सभापती सुभाष लोंढे यांच्या अध्यक्षतेखाली नगरसेवक निखील वारे व इतर सदस्यांनी प्रशासनाच्या ढिसाळ कारभारावरून अधिकाऱ्यांची चांगलीच कोंडी केली.
शहरातील माळीवाडा वेस पाडून महात्मा ज्योतिबा फुले व क्रांतिज्योती सावित्रीबाई फुले यांचा पुतळा उभारण्याच्या कामाला न्यायालयातून स्थगिती मिळाल्याने व प्रारूप आराखड्यात कायदेशीर अडथळे निर्माण झाल्याने सदस्यांनी न्यायालयीन विभागाच्या कार्यपद्धतीवर तीव्र संताप व्यक्त केला.
पॅनलवरील वकिलांवर लाखो रुपये खर्च होऊनही उच्च न्यायालयात वेळेत ‘कॅव्हेट’ दाखल न केल्याने तसेच सभेला संबंधित विधी अधिकारी अनुपस्थित राहिल्याने सभापतींनी विभागाच्या कामकाजाचे वाभाडे काढले.
यासोबतच, वाढत्या चोऱ्या रोखण्यासाठी शहरातील चौकाचौकांत सीसीटीव्ही बसवणे, घंटागाडीच्या क्यूआर कोड प्रणालीतील संभाव्य घोटाळ्याची चौकशी करणे, पाण्याची नासाडी करणाऱ्यांवर फौजदारी गुन्हे दाखल करणे आणि पाणी टँकरचालकांची अल्कोमीटर व वैद्यकीय तपासणी करणे आदी महत्त्वपूर्ण मागण्या या सभेत करण्यात आल्या.




