
अहिल्यानगर शहरातील आनंदधाम समोरील अर्चना अपार्टमेंटमध्ये घरकामासाठी ठेवलेल्या मोलकरणीने ७८ वर्षीय वृद्ध महिलेची नजर चुकवून ७४ हजार ५०० रुपयांचा ऐवज चोरून नेल्याची घटना घडली.
याप्रकरणी फ्लॅट क्रमांक २ मधील रहिवासी लता रतनलाल बोरा यांनी सारसनगर येथील अंजली नावाच्या आरोपी मोलकरणीविरुद्ध फिर्याद दिली आहे. १६ नोव्हेंबर रोजी सकाळी ९ ते १०.३० वाजेच्या दरम्यान आरोपी महिला घरात काम करत असताना तिने संधी साधून बेडरूमच्या कपाटातील ६५ हजार रुपये किमतीचे २७ ग्रॅम वजनाचे सोन्याच्या धातूचा बेल्ट असलेले मनगटी घड्याळ, ४ हजार ५०० रुपये रोख रक्कम आणि बेडवर ठेवलेला ५ हजार रुपयांचा नोकिया कंपनीचा मोबाईल असा एकूण ७४ हजार ५०० रुपयांचा मुद्देमाल लंपास केला.
फिर्यादींनी वारंवार मागणी करूनही आरोपी महिलेने चोरी केलेला ऐवज परत न दिल्याने अखेर त्यांनी १८ नोव्हेंबर रोजी रात्री कोतवाली पोलीस ठाण्यात धाव घेतली. पोलिसांनी भारतीय न्याय संहिता कलम ३०६ अन्वये गुन्हा दाखल केला असून पुढील तपास सुरू आहे.




