34 वर्षानंतर सापडली 7 एकर जमीन..आता भव्य क्रिकेट स्टेडियमचे स्वप्न साकारणार

अहिल्यानगरमधील नेप्ती बाजार समिती परिसरातील क्रीडा उपक्रमांसाठी दान केलेली सात एकर हक्काची जमीन तब्बल ३४ वर्षांनंतर जिल्हा क्रीडा अधिकारी कार्यालयाला परत मिळाली आहे.

मार्च १९९२ मध्ये रमेश गोविंद वाबळे यांनी ही जमीन जिल्हा क्रीडा अधिकारी कार्यालयाच्या नावे बक्षीसपत्र करून दिली होती; मात्र सरकारी दप्तरी नोंद होऊनही महसूल विभागाच्या दुर्लक्षामुळे तीन दशकांहून अधिक काळ या जागेची मोजणी व हद्द निश्चिती झाली नव्हती.

काही दिवसांपूर्वी ज्येष्ठ क्रीडा संघटनांकडून मिळालेल्या संदर्भानंतर जिल्हा क्रीडा अधिकारी ज्ञानेश्वर खुरांगे यांनी जुन्या कागदपत्रांची पडताळणी करून हा शोध लावला. जिल्हाधिकारी डॉ. पंकज आशिया यांच्या आदेशानुसार भूमी अभिलेख विभागाने नुकतीच या जागेची अधिकृत मोजणी करून हद्द निश्चित केली आहे.

वाडिया पार्क मैदानावर जागेअभावी मर्यादा येत असल्याने, आता या सात एकर जागेवर भव्य क्रिकेट स्टेडियमसह इतर खेळांसाठी अत्याधुनिक क्रीडा सुविधा उभारण्याचा मार्ग मोकळा झाला असून यासाठी आमदार संग्राम जगताप पुढाकार घेणार आहेत.