बेलापूरला जाताना भरधाव कार पुलाच्या कठड्याला धडकली, राष्ट्रवादीच्या नेत्याच्या नातवाचे निधन

एनआरआय वसाहतीकडून पामबीच मार्गालगतच्या सर्व्हिस रोडवरून बेलापूरच्या दिशने जाणारी भरधाव होंडा सिटी कार रेल्वे पुलाच्या कठड्याला धडकल्याने झालेल्या अपघातात कार चालक साहिल वानखेडकर (२८) याचा जागीच मृत्यू झाला. ही घटना शुक्रवारी पहाटे एनआरआय वसाहतीजवळ घडली.

वानखेडकर हा माजी आमदार आणि राष्ट्रवादीचे नेते सीताराम घनदाट यांचा नातू असल्याचे पोलिसांनी सांगितले. सहिल वानखेडकर सानपाडा येथे वास्तव्यास होता. शुक्रवारी पहाटे ४.३० वाजताच्या सुमारास तो कारने एनआरआय वसाहतीतून पामबीच मार्गालगतच्या सर्व्हिस रोडने बेलापूरच्या दिशेने जात असताना झालेल्या अपघातात तो कारबाहेर फेकला गेला व गंभीर जखमी झाल्याने त्याचा जागीच मृत्यू झाला.

या अपघातानंतर कारने पेट घेतला. या घटनेची माहिती मिळताच एनआरआय पोलिसांनी घटनास्थळी धाव घेऊन अग्निशमन दलाच्या मदतीने ही आग विझवली. वानखेडकर इतक्या पहाटे कुठून कुठे चालला होता. याबाबत अद्याप कुठल्याही प्रकारची माहिती मिळाली नसल्याचे वरिष्ठ पोलिस निरीक्षक प्रमोद तोरडमल यांनी सांगितले.

सीताराम घनदाट हे परभणी जिल्ह्यातील गंगाखेडचे माजी आमदार आहेत. तीन वर्षांपूर्वी त्यांनी राष्ट्रवादी काँग्रेसमध्ये प्रवेश केला होता.

अभ्युदय बँकेचे संचालक व सहकार क्षेत्रातील एक मोठं नाव असलेल्या ‘घनदाट मामा’च्या प्रवेशामुळं राष्ट्रवादीला बळ मिळाल्याचं पाहायला मिळालं होतं.