अहिल्यानगरमधील दर्गा पाडणाऱ्या दोन जणांसह जेसीबी चालकाला पोलिसांनी केली अटक

शहरातील आनंदीबाजार पटवर्धन चौकाजवळील देशपांडे हॉस्पिटल परिसरातील हिंदू-मुस्लिम समाजाचे श्रद्धास्थान असलेला दर्गा अनोळखी लोकांनी जेसीबीच्या साह्याने पाडला. ही घटना रविवारी (दि. २४) रोजी पहाटे घडली.

याप्रकरणी कोतवाली पोलीस ठाण्यात गुन्हा दाखल झाला असून, धार्मिकस्थळ पडल्याने शहरात काहीकाळ तणावाचे वातावरण निर्माण झाले होते. दरम्यान, याप्रकरणी पोलिसांनी जेसीबी चालकासह दोघांना ताब्यात घेतले.

योगेश सखाराम झोंड (रा. बोरूडे मळा, बालिकाश्रम रोड, अहिल्यानगर, मूळ रा. धोंडेवाडी रोड, वाळकी, ता.जि. अहिल्यानगर), बबलू पाल (रा. बोरूडे मळा, बालिकाश्रम रोड, मूळ रा. उत्तर प्रदेश), जेसीबी मालक अरुण गोविंद खरात (रा. समता चौक, सावेडी, अहिल्यानगर अशी अटक केलेल्यांची नावे आहे. सचिन दारकुंडे (रा. समतानगर, सावेडी ता. जि. अहिल्यानगर), दत्ता गायकवाड (पूर्ण नाव माहीत नाही) व अन्य तीन अनोळखी व्यक्तींचा संशयित आरोपींमध्ये समावेश आहे.

याबाबत अॅड. वसीम राउफ खान (रा. देशपांडे हॉस्पिटलजवळ पटवर्धन चौक, आनंदीबाजार अहिल्यानगर) यांनी पोलिसांत फिर्याद दिली.

रविवारी पहाटे साधारण तीन वाजता एक पिवळ्या रंगाच्या जेसीबी चालक व निळ्या रंगाच्या चेतक मोपेडवरून आलेल्या अनोखळी व्यक्तीने हिंदू-मुस्लिम समाजाचे श्रद्धास्थान असलेल्या दर्गाची तोडफोड करून जाणीवपूर्वक धार्मिकस्थळाचे नुकसान केले. तसेच, दंगल घडवून आणण्याच्या उद्देशाने हे कृत्य केल्याचे फिर्यादीत म्हटले आहे. गुन्ह्याचा तपास पोलीस उपनिरीक्षक कृष्णकुमार सेंदवाड करीत आहेत.

घटनेची माहिती समजताच पोलीस अधीक्षक सोमनाथ घार्गे, अपर पोलीस अधीक्षक वैभव कलुबर्मे, उपअधीक्षक शिरीष वमने, एलसीबी पोलीस निरीक्षक किरणकुमार कबाडी, पोलीस निरीक्षक आनंद कोकरे, पोलीस निरीक्षक प्रताप दराडे यांनी घटनास्थळी धाव घेतली. सकाळी आनंदी बाजार परिसरात तणावाचे वातावरण निर्माण झाले होते. पोलिसांनी जास्तीची कुमक मागवून परिसरातील परिस्थिती नियंत्रणात आणली. रविवारी दिवस परिसरात बंदोबस्त तैनात करण्यात आला होता.

घटनेची गांभीर्य ओळखून स्थानिक गुन्हे शाखेच्या पोलिस पथकाने आरोपींचा शोध सुरू केला होता. तांत्रिक उपकरणांचा वापर करून गुन्ह्याची उकल केली. गुन्ह्यातील जेसीबीचा मालक अरुण खरात याला ताब्यात घेतले. जेसीबीची चौकशी केली असता बबलू पाल याला चालविण्यास दिल्याचे सांगितले. त्याला ताब्यात घेतल्यानंतर अन्य आरोपींची नावे समजली. पोलिसांनी योगेश झोंड, बबलू पाल, जेसीबी मालक अरुण गोविंद खरात या तिघांना तपासाकामी कोतवाली पोलीस ठाण्यात हजर करण्यात आले.ही कारवाई स्थानिक गुन्हे शाखा, कोतवाली व तोफखाना पोलिसांनी केली.

कोतवाली पोलिस ठाण्याच्या हद्दीतील आनंदीबाजार परिसरातील रस्ता लगत असणाऱ्या दर्गाची समाजकंटकांनी तोडफोड केली. याप्रकरणी कोतवाली पोलीस ठाण्यात गुन्हा दाखल करण्यात आला असून, तीन संशयितांना ताब्यात घेण्यात आले आहे. गुन्ह्यातील जेसीबी जप्त करण्यात आला.

पोलिस गुन्ह्याचा कसून तपास करीत असून, कायदेशीर कारवाई करीत आहेत. समाज बांधवांनी शांतता बाळगावी आणि अफवांवर विश्वास ठेवू नये.सोमनाथ घार्गे, पोलीस अधीक्षक यांनी सांगितले.