अहिल्यानगर शहरातील साड्या पाहायला आली आणि 14 तोळ्याचे दागिने घेऊन पसार झाली..
अहिल्यानगर शहरातील विद्यानगर परिसर येथे १ ऑगस्ट २०२६ रोजी मैत्रिणीच्या विश्वासाचा गैरफायदा घेऊन १४ तोळ्यांचे सोन्याचे दागिने आणि १ लाख रुपयांची रोकड चोरल्याप्रकरणी एका तरुणीवर गुन्हा दाखल करण्यात आला आहे.
फिर्यादी प्रीती बबन बोठे (वय ३८) यांच्या घरात कपाटातील दागिने ठेवलेले होते. त्यांची कॉलेजमधील मैत्रीण आरोपी स्नेहल ज्ञानदेव बेंद्रे (वय २५, मूळ रा. बाभळेश्वर, राहाता) हिने २९ जुलै रोजी मुलगा पाहण्याच्या कार्यक्रमासाठी साडी हवी असल्याचा बहाणा करून घरात प्रवेश केला.
कपाटात साड्या पाहत असताना स्नेहलने बेडरूममध्ये एकटीच असल्याचा गैरफायदा घेऊन कपाटातील दागिने आणि रोकड लंपास केली.
शनिवार, १ ऑगस्ट रोजी फिर्यादीला कपाटातील रोकड आणि दागिने गायब असल्याचे लक्षात आले. मैत्रीण स्नेहल हिनेच हा विश्वासघात करून ऐवज चोरल्याचा संशय असल्याने बोठे यांनी कोतवाली पोलीस ठाण्यात तक्रार दिली. त्यानुसार पोलिसांनी स्नेहल बेंद्रे विरुद्ध गुन्हा दाखल केला असून पुढील तपास सुरू आहे.
