खासदार नीलेश लंके यांच्या प्रकृतीत सुधारणा, रूबी हॉलमध्ये राजकीय नेत्यांच्या भेटी

विषाणूजन्य ताप आणि डिहायड्रेशनमुळे पुण्यातील रुबी हॉल क्लिनिक येथे उपचार घेत असलेले राष्ट्रवादी काँग्रेसचे खासदार नीलेश लंके यांच्या प्रकृतीत झपाट्याने सुधारणा होत असल्याची माहिती रविवारी रुग्णालयाच्या सूत्रांकडून देण्यात आली. गेल्या काही दिवसांपासून त्यांच्या प्रकृतीबाबत काळजी व्यक्त केली जात असताना आता उपचारांना चांगला प्रतिसाद मिळत असल्याने कार्यकर्ते आणि समर्थकांमध्ये दिलासा व्यक्त होत आहे.

रविवारी दिवसभर विविध राजकीय नेते, पदाधिकारी, कार्यकर्ते आणि निकटवर्तीयांनी रूबी हॉल क्लिनिक येथे जाऊन खा. लंके यांच्या प्रकृतीची विचारपूस केली. खासदार अमोल कोल्हे, आमदार रोहित पवार, खासदार बजरंग सोनवणे यांच्यासह नगर जिल्हा आणि राज्यातील अनेक राजकीय, सामाजिक क्षेत्रातील मान्यवरांनी त्यांची भेट घेत लवकर बरे होण्यासाठी शुभेच्छा दिल्या.Maps

गेल्या गुरुवारी खा. लंके यांना प्रकृती अधिक बिघडल्याने पुण्यातील रूबी हॉल क्लिनिक येथे उपचारासाठी दाखल करण्यात आले होते. सततचे दौरे, सामाजिक मोहिमा, लग्नसराईतील कार्यक्रम, अपुरी विश्रांती आणि शारीरिक थकवा यामुळे त्यांची प्रकृती खालावल्याचे डॉक्टरांनी सांगितले होते.

तामीळनाडूतील जिंजी किल्ल्यावर राबविण्यात आलेल्या स्वच्छता व संवर्धन मोहिमेत सहभाग घेतल्यानंतर ते कोल्हापूर, नाशिक, संगमनेर आणि नगर जिल्ह्यातील विविध कार्यक्रमांमध्ये सहभागी झाले होते. प्रकृती अस्वस्थ असतानाही त्यांनी कार्यक्रम सुरूच ठेवले. याच धावपळीचा परिणाम त्यांच्या आरोग्यावर झाल्याचे बोलले जात आहे.

रविवारी दिवसभर रूबी हॉल क्लिनिक परिसरात कार्यकर्ते आणि समर्थकांची मोठी वर्दळ पाहायला मिळाली. विविध भागांतून आलेल्या कार्यकर्त्यांनी खा. लंके यांच्या प्रकृतीबाबत माहिती घेतली. अनेकांनी रुग्णालयाबाहेर थांबून त्यांच्या लवकर प्रकृती सुधारण्यासाठी शुभेच्छा व्यक्त केल्या.

खा. अमोल कोल्हे, रोहित पवार आणि बजरंगबप्पा सोनवणे यांनी भेटीनंतर खा. लंके यांच्या प्रकृतीबाबत समाधान व्यक्त केले. “प्रकृतीत चांगली सुधारणा होत असून काळजीचे कारण नाही. डॉक्टरांनी विश्रांतीचा सल्ला दिला आहे,” असे त्यांनी सांगितल्याची माहिती खा. लंके यांच्या समवेत असलेले डॉ. बाळासाहेब कावरे, नगरसेवक योगीराज गाडे, अनिल गंधात्ते, शिवाजी कराळे यांनी सांगितले.

खा. लंके यांच्या प्रकृतीत सुधारणा होत असल्याची माहिती समोर आल्यानंतर सोशल मीडियावरूनही त्यांच्या कार्यकर्त्यांमध्ये समाधान व्यक्त करण्यात येत आहे.

नगर जिल्ह्यासह राज्यभरातील कार्यकर्ते, पदाधिकारी आणि नागरिकांकडून त्यांच्या लवकर बरे होण्यासाठी प्रार्थना व्यक्त करण्यात येत आहेत.

दरम्यान, खा. लंके लवकरच पूर्णपणे बरे होऊन पुन्हा जनतेच्या सेवेत सक्रिय होतील, असा विश्वास त्यांच्या समर्थकांकडून व्यक्त करण्यात येत आहे.