​अहिल्यानगर शहरात महिलेवर चाकूने सपासप वार, कोतवाली पोलीस ठाण्यात गुन्हा दाखल

​अहिल्यानगर शहरातील मल्हार चौक परिसरात किरकोळ वादातून एका महिलेवर चाकूने हल्ला केल्याची घटना घडली आहे. या प्रकरणी बाळासाहेब मल्हारी भंडारकर याच्याविरुद्ध कोतवाली पोलीस ठाण्यात गुन्हा दाखल करण्यात आला आहे. ​

मिळालेल्या माहितीनुसार, मल्हार चौक, स्टेशन रोड येथे ही घटना घडली. आरोपी बाळासाहेब भंडारकर याने फिर्यादी महिलेला विनाकारण शिवीगाळ करत लाथाबुक्क्यांनी मारहाण केली. रागाच्या भरात आरोपीने जवळ असलेल्या भाजी कापण्याच्या चाकूने महिलेवर सपासप वार केले. घटनेनंतर जखमी महिलेला तातडीने रुग्णालयात उपचारासाठी दाखल करण्यात आले. ​

कोतवाली पोलिसांनी या घटनेचा पंचनामा केला असून गुन्ह्यात वापरलेला चाकू जप्त केला आहे. या प्रकरणाचा पुढील तपास पोलीस निरीक्षक संभाजी गायकवाड यांच्या मार्गदर्शनाखाली पोलीस हवालदार सोनवणे करत आहेत. भरवस्तीत झालेल्या या हल्ल्यामुळे परिसरात काही काळ तणावाचे वातावरण निर्माण झाले होते.

​