अहिल्यानगर शहरातील न्यू आर्ट्स कॉलेज परिसरात किरकोळ कारणावरून एका तरुणाला लाथाबुक्क्यांनी आणि टनक वस्तूने बेदम मारहाण केल्याची घटना घडली आहे.
या राड्यामध्ये फिर्यादीची सोन्याची चैन गहाळ झाली असून, तोफखाना पोलीस ठाण्यात गुन्हा दाखल करण्यात आला आहे.
मिळालेल्या माहितीनुसार, फिर्यादी धान्य विठ्ठल काकडे (वय २०, रा. मिस्तबाग) हे २२ फेब्रुवारी रोजी रात्री साडेनऊच्या सुमारास चोभे हॉस्पिटलकडे जाणाऱ्या रस्त्यावरून जात होते. यावेळी आरोपी पंकज पराळे हा मोटारसायकलवरून, तर ऋषिकेश पराळे हा काळ्या रंगाच्या ‘थार रॉक्स’ (क्रमांक एम.एच. १६ डी.डब्ल्यू. १०००) कारमधून आपल्या सहकाऱ्यांसह तेथे आले. आरोपींनी फिर्यादीला गाठून अश्लील शिवीगाळ करण्यास सुरुवात केली.
यावेळी एका आरोपीने काकडे यांची गळ्यातील सोन्याची चैन आणि कॉलर धरून त्यांना खाली ओढले, ज्यामध्ये त्यांची चैन गहाळ झाली. त्यानंतर आरोपींनी त्यांना लाथाबुक्क्यांनी मारहाण करत कोणत्या तरी टनक वस्तूने डोक्यावर व कानामागे प्रहार करून जखमी केले. “तुला बदला घ्यायचा असेल तर कायनेटिक चौकात ये, तिथे बघतोच,” अशी धमकी देऊन आरोपी पसार झाले.
याप्रकरणी तोफखाना पोलिसांनी पंकज पराळे, ऋषिकेश पराळे व इतर दोघांविरुद्ध गुन्हा नोंदवला असून पोलीस नाईक अरुण गांगुडे पुढील तपास करत आहेत.
