अहिल्यानगर जिल्ह्यात निवडणुकीसाठी पोलीस दल सज्ज, अडीच हजारांहून अधिक बंदोबस्त तैनात

अहिल्यानगर जिल्ह्यातील 11 नगरपरिषद व 1 नगरपंचायतीच्या सार्वत्रिक निवडणुकांचे काउंटडाउन सुरू झाले असून मंगळवारी (2 डिसेंबर) मतदान आणि बुधवारी (3 डिसेंबर) मतमोजणी प्रक्रिया पार पडणार आहे. निवडणुकीच्या पार्श्वभूमीवर जिल्हा पोलीस दलाने कायदा व सुव्यवस्था अबाधित राखण्यासाठी कडेकोट सुरक्षा व्यवस्था उभारली असून तब्बल अडीच हजारांहून अधिक पोलीस व होमगार्डचा बंदोबस्त तैनात करण्यात आला आहे.

पोलीस अधीक्षक सोमनाथ घार्गे यांच्या मार्गदर्शनाखाली संपूर्ण यंत्रणा सज्ज झाली आहे.जिल्ह्यातील संगमनेर, कोपरगाव, शिर्डी, राहाता, श्रीरामपूर, देवळाली प्रवरा, राहुरी, शेवगाव, पाथर्डी, जामखेड व श्रीगोंदा या 11 नगरपरिषदांसह नेवासा नगरपंचायतीच्या निवडणूक प्रचार शेवटच्या टप्प्यात आला आहे. आज (रविवार) व उद्या (सोमवार) अशा दोन दिवस प्रचारासाठी बाकी आहेत.

काही ठिकाणी प्रचारादरम्यान तणाव निर्माण झाल्याची नोंद असून काही भाग संवेदनशील असल्याने पोलिसांनी विशेष तयारी केली आहे. मतदारांना निर्भिडपणे मतदान करता यावे, कोणताही अनुचित प्रकार घडू नये यासाठी रविवारीपासूनच मतदान केंद्र असलेल्या शहरांमध्ये दंगल काबू पथकांचा ताफा, रूट मार्च, तसेच संवेदनशील भागांत कडक नजर ठेवली जाणार आहे.

पोलीस अधीक्षक घार्गे यांच्या आदेशानुसार अप्पर पोलीस अधीक्षक वैभव कलुबर्मे, तसेच अप्पर पोलीस अधीक्षक (श्रीरामपूर) सोमनाथ वाकचौरे हे स्वतः परिस्थितीची नियमित पाहणी करणार आहेत.

रविवारपासून सुरू होणारा पोलीस बंदोबस्त मतदान व मतमोजणी प्रक्रिया पूर्ण होईपर्यंत कायम ठेवण्यात येणार आहे. जिल्हाभरात गस्त, नाका बंदी, गोंधळ निर्माण करणार्‍यांवर कडक कारवाई, तसेच संशयित हालचालींवर विशेष लक्ष देण्याचे आदेश पोलीस दलाला देण्यात आले आहेत. व्यापक सुरक्षा व्यवस्थेमुळे मतदान, मतमोजणी आणि संपूर्ण निवडणूक प्रक्रिया शांततेत व पारदर्शकपणे पार पडावी, या उद्देशाने जिल्हा पोलिसांनी कंबर कसली आहे.

पोलीस अधीक्षक घार्गे यांच्या नेतृत्वाखाली अप्पर पोलीस अधीक्षक 2, पोलीस उपअधीक्षक 6, पोलीस निरीक्षक 21, सहायक पोलीस निरीक्षक व उपनिरीक्षक 67, पोलीस अंमलदार 1371, आरसीपी 3 प्लाटून, एसआरपीएफ 15 सेक्शन, होमगार्ड 886 असा बंदोबस्त तैनात असणार आहे.