अवकाळी पावसाची शक्यता..
तालुक्यात सध्या सतत बदलणारे हवामान आणि अवकाळी पावसाची शक्यता यामुळे शेतकऱ्यांमध्ये चिंतेचे वातावरण पसरले आहे. हवामान खात्याने दिलेल्या अंदाजानुसार, पुढील आठवडाभर अवकाळी पावसाचे संकट कायम राहण्याची शक्यता आहे.यामुळे गहू आणि कांदा या प्रमुख पिकांचे मोठे नुकसान होण्याची भीती बळिराजाला सतावत आहे. मागील आठवड्यात जिल्ह्यातील काही भागांत आणि कोकणपट्टीत अवकाळीने हजेरी लावली होती.
आता तेच संकट नेवासा परिसरात येऊन ठेपल्याने शेतकऱ्यांची झोप उडाली आहे. हातातोंडाशी आलेला घास हिरावला जाण्याची शक्यता त्यांना अस्वस्थ करत आहे.
या अवकाळीच्या धास्तीने शेतकरी गहू काढणीला गती देण्यासाठी धडपडत आहेत. मिळेल त्या भावात हार्वेस्टर लावून गहू काढण्याची लगीनघाई सुरू आहे.
पण वातावरण ढगाळ असल्याने गहू पूर्णपणे वाळण्याआधीच काढावा लागत आहे. गेल्या दोन दिवसांपासून रात्रंदिवस गहू काढण्याचे काम जोरात सुरू आहे. शेतकरी सांगतात की, जर अवकाळी पाऊस आला तर गव्हाला कोंब फुटण्याची भीती आहे, ज्यामुळे त्याची गुणवत्ता आणि बाजारभाव दोन्ही घसरतील. अशा परिस्थितीत त्यांच्यावर आर्थिक संकट कोसळण्याची शक्यता आहे.
दुसरीकडे, कांदा पिकाचीही चिंता शेतकऱ्यांना भेडसावत आहे. काही शेतकऱ्यांनी कांदा काढणीला सुरुवात केली आहे, पण अवकाळी पावसामुळे त्याचे नुकसान होण्याचा धोका वाढला आहे.
पाऊस पडला तर कांदा सडण्याची भीती आहे, आणि त्यामुळे शेतकऱ्यांचे मेहनतीचे पैसे वाया जाण्याची शक्यता आहे. गेल्या दोन दिवसांत वातावरणात मोठा बदल झाला आहे. ढगाळ आकाश आणि वाढलेली आर्द्रता यामुळे शेतकऱ्यांची धाकधूक वाढली आहे.
या संकटातून मार्ग काढण्यासाठी शेतकरी जिथे शक्य आहे तिथे घाई करत आहेत, पण तरीही निसर्गाच्या लहरीपणापुढे त्यांचे हात बांधलेले दिसत आहेत.या सगळ्या परिस्थितीत हार्वेस्टरच्या मागणीतही वाढ झाली आहे. त्यामुळे हार्वेस्टरचे भाव वाढण्याची शक्यता निर्माण झाली आहे. शेतकऱ्यांना आधीच नुकसानाची भीती आहे, त्यात हार्वेस्टरच्या वाढत्या खर्चाने त्यांची गळचेपी होत आहे.
एकीकडे अवकाळीचे संकट, दुसरीकडे आर्थिक दबाव अशा दुहेरी कोंडीत शेतकरी सापडले आहेत. हवामान खात्याचा अंदाज खरा ठरला, तर गहू आणि कांदा या दोन्ही पिकांचे प्रचंड नुकसान होऊन बळिराजाला मोठा फटका बसणार आहे. आता निसर्ग काय वळण घेतो, याकडे सगळ्यांचे लक्ष लागले आहे.
