सावेडी येथील समर्थ विद्या मंदिर शाळेत साकारले १२५ ‘मातीचे बाप्पा’

पर्यावरणपूरक गणेशोत्सवाला चालना देण्यासाठी अहिल्यानगर महानगरपालिका यांच्या वतीने ‘मातीचे गणेश, घरातच विसर्जन’ अभियानांतर्गत सावेडी येथील समर्थ विद्या मंदिरात शाडूच्या मातीपासून गणेशमूर्ती बनवण्याची कार्यशाळा घेण्यात आली.

या कार्यशाळेत १२५ विद्यार्थ्यांनी शाडूच्या मातीपासून पर्यावरणपूरक गणेशमूर्ती साकारल्या. मूर्ती बनवताना कागद, काड्या, पाने, पुठ्ठा आदी पर्यावरणपूरक साहित्याचा वापर करण्यात आला.

आयुक्त यशवंत डांगे यांच्या पुढाकारातून झालेल्या या उपक्रमाला सुरेश क्षीरसागर, ॲड. किशोर देशपांडे यांचे सहकार्य लाभले.

यावेळी प्राचार्या वसुधा जोशी, पर्यवेक्षिका शारदा होशिंग, पर्यावरणदूत डॉ. अमोल बागुल, कलाशिक्षक विवेक भारताल, अरुण राशिनकर व सुनील रायकर उपस्थित होते.