जिल्ह्यात १५ दिवस मध्यरात्री १२ वाजेपर्यंत ध्वनिक्षेपक वापरण्यास परवानगी; जिल्हाधिकारी डॉ. पंकज आशिया यांचे आदेश

जिल्ह्यात सन २०२६ मधील सण व उत्सवांच्या काळात एकूण १५ दिवस सकाळी ६.०० ते रात्री १२.०० वाजेपर्यंत ध्वनिक्षेपक व ध्वनीवर्धक वापरण्यास जिल्हाधिकारी तथा जिल्हादंडाधिकारी डॉ. पंकज आशिया यांनी परवानगी दिली आहे.

राज्य शासनाच्या पर्यावरण विभागाचे आदेश व सुधारित ध्वनी प्रदूषण (नियमन व नियंत्रण) नियम २०१७ नुसार ही सूट जाहीर करण्यात आली असून, श्रोतृगृहे, सभागृहे व मेजवानी कक्ष यांसारख्या बंद जागा वगळता इतर ठिकाणी ही सवलत लागू राहील.

जिल्हा प्रशासनाने निश्चित केलेल्या या १५ दिवसांमध्ये १९ फेब्रुवारी रोजीची शासकीय शिवजयंती, १४ एप्रिल रोजीची डॉ. बाबासाहेब आंबेडकर जयंती, १ मे रोजीचा महाराष्ट्र दिन व २६ ऑगस्ट रोजीच्या ईद-ए-मिलादचा समावेश आहे. याशिवाय गणपती उत्सवात १५ सप्टेंबर रोजीचा दुसरा दिवस, १८ सप्टेंबर रोजीचे गौरी पूजन, १९ सप्टेंबर रोजीचे गौरी विसर्जन व २५ सप्टेंबर रोजीची अनंत चतुर्दशी असे चार दिवस रात्री बारापर्यंत ध्वनिक्षेपक वापरता येतील.

नवरात्रोत्सवात ११ ऑक्टोबर रोजीची अष्टमी व २० ऑक्टोबर रोजीची नवमी, तर दीपावलीमध्ये ८ नोव्हेंबर रोजीचे लक्ष्मीपूजन, २५ डिसेंबर रोजीचा ख्रिसमस व ३१ डिसेंबर या दिवशीदेखील ध्वनिक्षेपकासाठी सूट देण्यात आली आहे.

उर्वरित दोन दिवसांसाठी राज्य शासनाच्या अटींच्या अधीन राहून आवश्यकतेनुसार जिल्हाधिकाऱ्यांच्या मान्यतेने परवानगी देता येईल.